बोगी’ खंग्वः ‘बुद्धगीत’या अपभ्रश खः । गुलाया दकलय् न्हापांगु दिं गुलाथ्व पारुखुन्हु म्ये हालाः बोगी ब्वनाः मतयाःया लंपु लिनाः बाच्यासय् च्वंगु चैत्य, धर्मधातु व बहाःबहिली प्रदक्षिणा यानाः बोगी बनेगु याइ । न्हापा-न्हापा न्हय्म्ह तथागत बुद्धपिनिगु लुमन्तिकथं न्हय्न्दुतक बोगी वनेगु याइसां थौंकन्हय् न्यान्तु स्वचाय्‌केगु यानावयाच्वंगु जुल । पञ्चबुद्ध तथागतयात लुमंकाः न्यान्हु चाःहिलाः क्वचाय्कातःगु बैगु धापू दु ।

बोगी वनेगुया विशेषता

गुला बाहेक मेबलय् बोगी (बुद्धगीत) व्वनेगु चलन मदु। गुंलाया शुभारम्भ जुइबलय् नसंचा इलय् बोगी बनाः निभाः लुइन्यः हे बोगीया यात्रा दिकेमाःगु परम्परा दु । निभाः लुइवं चिभाःया किचः खनेदयावइ, जले चिभाः चाःहिलीबलय् भक्तजनपिन्सं चिभाःया किचःयात न्हुइफुगु जुयाः किचः तक नं मन्दुइमा धकाः निभाः लुइन्ह्यः बोगी दिकेमाःगु चलन यानातःगु खः । उकिं बोगी नसंचा इलय् वनेगु यानातःगु खः । कन्हय्खुन्हु नसंचा इलय् म्हिगः गुगु बासय् बोगी दिकूगु खः हाकनं उगु हे थासं बोगी न्ह्याकेगु बाइ। यलया फुक्क चिभाःया पूजा, प्रदक्षिणा याय्गु पूवनेवं बोगी नं क्वचाइ। विशेष यानाः यल पञ्जाष्टमीसिवें न्ह्यः हे बोगी क्वचाय्केमाःगु चलन दु ।