नासःद्यः म्हसिका

‘नासः’ खँग्व:या अर्थ नेवाःभासं हिसि व मेपिंत आकर्षित याय्‌गु थ:याके दुने दुगु प्रतिभा, गुण, अर्थसिद्धि व क्षमता खः । थथे पिनेखने मदुगु दुने सुलाच्वंगु विभिन्न प्रतिभा, गुण, मेपिंत आकर्षित याय्‌गु क्षमताया सिद्धि बियाबिज्याइम्ह द्य: जूगुलिं ‘नासःद्यः’ धयातःगु खः । पिने खनेदै मखुगु सिद्धि बियाबिज्याइम्ह द्य: जूगुलिं वसपोलयात नं पिने खने मदय्‌क अंगलय् प्वाःजक तयाः ‘नासःद्य:’ पुजा यानावयाच्वंगु खः । प्वाःजक तयातःगु धैगु दुने च्वंगु प्रतिभा, गुण, व क्षमता धयागु पिने खने दैमखु धकाः क्यनातःगु खः । नासः द्यःया मूल स्वरुप अध्ययन याय्‌बलय् नं स्वंगू प्वाःयात सामाजिक रक्षक, बुद्धि व ज्ञान प्राप्तिया रुपय् पुजा यानावयाच्वंगु दु। नेवाःतय्‌गु बस्तिइ नीस्वनातःपिं नासःद्यःत मध्ये नुवाकोतया कबिलासय् नीस्वना तःम्ह नासःद्यःयात दकलय् पुलांम्ह नासःद्यः धकाः माने यानातःगु दु। थुम्ह नासःद्यःयागु नं मूर्ति मदु। ल्वहंफाः छगलय् प्वाः तयातःगु दु व प्वाःयात हे नासःद्यःया प्रतिक माने यानाः पुजा यानातःगु दु। लिपा कबिलसया नासःद्यः नेपालमण्डलय् चाःह्यूवःबलय् गन गन बाय् च्वंगु खः अनअन नासःद्यः नीस्वनाः नासःद्यःयात पुजा यानातःगु खः धैगु मान्यता दु । वहे कारणं यानाः मनूया जीवनय् छक्वःसां कबिलास वनेमाः धैगु न्हापायापिं मनूतय्‌गु धापू दु ।

नासःद्यःया थासय् मूर्ति मतःसे स्वंगू प्वाःजक तयातःगु बारे छगू किवदन्ति थथे दु – द्वापर युगया अन्त्यपाखे महाभारतया इलय् भिमसेन चाःह्यूवःबलय् नासःद्यःयात खन । नासःद्यःयात खना भिमसेनं म्ये हाले सय्‌केगु इच्छा यानाः, भिमसेनं नासःद्यःयात म्ये हालेगु स्यनाब्यु धकाः इनाप यात । भिमसेनयागु सः म्येहालेत मज्यू, छं बांलक सः पिकयाः म्ये हाले फैमखु धकाः धालं भिमसेनं जिद्दि यानाः हालाच्वन । यक्व हे हासेंलि नासःद्यवं म्ये हालेगु स्यन, न्ह्याक्व हे स्यंसां भिमसेनं सुरय् लाकाः हाले मफु थःगु हे तालय् जक हालेगु यानाच्वन । थथे सुर छके ताल छखे यानाः म्यें हाले सल धकाः थःम्हं सय्‌कागु म्ये सकसितं न्यंकेगु इच्छा यानाः मनूत मुनाच्वंथाय् वनाः म्ये हालेगु यात । भिमसेनं म्ये हाःगु म्ये न्यना छेँदुने च्वंपिं मनूत झ्यालं क्वसुयाः थ्व सु गधा हाःगु, भिमसेन गधा जुलला कि छु ? धाःगु न्यनाः भिमसेनं तं पिकयाः जित म्ये स्यनाः गधा याय्‌गु स्वत धकाः तं पिकयाः नासःद्यःयात मस्यासें त्वःते मखु धकाः गदा म्हुयाः लिनाः यंकुबलय् नासःद्यः बिस्युं ववं गन वने जुयाः प्वालं दुहां वंगुलिं नासःद्यःया जःवय् खवय् च्वनीपिं नन्दी व भृन्दी नं प्वालय् दुहां वन । थथे स्वम्हं प्वालं दुहां वंगुलिं नासःद्यःयाथाय् स्वंगू प्वाः तयातःगु खः । स्वंगू प्वाः मध्ये दथुइयागु प्वाःयात नासःद्यःया प्रतीक जःखः च्वंगु निगू प्वाः नन्दी व भृन्दीया प्रतीक कथं प्वाः तयातःगु धाइ ।