गठन
न्यकू जात्रा मतयाः व्यवस्था समितिया पलिस्था
न्यकू जात्रा मतयाः पर्वयात जुजु सिद्धिनर्सिंह मल्लं दुर्गामि जुया स्वसः व न्येदँ न्ह्यव हे इलय् ब्यलय् वइगु थीथी कथंया मछिंपहः ज्यंकेत न्ह्याबलय् सकल जाना न्ह्यज्याय् फइगु कथं बांलाक व्यवस्था याना झिगु मू त्वायात पालंपा: ल:ल्हाना कथंह हंक ज्याझ्वः न्हयज्याना वयाच्वंगु दःसु इतिहास साछि दु । अवलय्निसें जुजुयागु वचन सिरोपर यानाः झी पुर्खापिनिसं भतिचा हे उखेथुखे मयासे छिंबलय् लय्लय्ताया मछिंबलय् लपूज्वना लुतुलुया जुसां थ्व पर्वयात पकाः चिइका न्ह्यज्याका वयाच्वंगु जुल ।
ई व्योया हुनि न्हापांनिसें लिकुनाच्वंगु थ्व पर्वया पकाः त बिस्पोट जुया गथे कि “गुरुपिनिगु समस्या, वाद्य वादनया समस्या, वाद्यवादकतय्गु समस्या, मेँ, राग, आर्थिक, आदि ई व्यःयागु कचिंगत हादनावथें हे काः वःबलय् पर्व न्ह्यज्याकीगु त्वायात सापहे थाकुया वल । थथे स्वसः त्या न्ह्यवयागु दुरदर्शितायात थातं तयातय्त झीगु त्वाः हे जाना ग्वाहालि याय्गु कथं इलं फुथें वा चाय्का २०५० सालं झिगु त्वा:या बुद्धिजिविपिं जाना न्यकू जात्रा मतयाः व्यवस्था समिति नीस्वंगु खः ।
थुकियात संस्था दर्ता ऐन २०३४ अन्तर्गत “न्यकू जात्रा मतयाः (श्रृङ्गजात्रा दिप यात्रा) व्यवस्था समिति” नामं २०५१ साल आषाढ १० गते ललितपुर जिल्ला प्रशासन कार्यालय विधिवत दर्ता नं यानागु जुल ।
तदर्थ समिति धकाः दर्ता जूगु थुगु समितिया नियमानुसार साधारण सभा जुया मिति २०५२ साल जेष्ठ ९ गते निर्विरोध निर्वाचित न्याम्ह पदाधिकारी व प्रत्येक झिगु त्वाःया पालापिनिगु क्षेत्रया छम्ह प्रतिनिधि सदस्य यानाः १५ झिंन्याम्हेसियागु कमिटी नं गठन जुल ।
थ्व ऐतिहासिक परंपरागत ज्याझ्वः यात ल्वय्क योग्यपिं सल्लाहकारपिं माःगु जुया क्वय् न्ह्यब्वयाथें सल्लाहकार नियुक्त यागु जुल ।
१) श्री सत्य मोहन जोशी – बखुंबहाः
२) श्री पं हेमराज शाक्य – थैना
३) श्री धर्मरत्न शाक्य – झतापोल
४) श्री लोक बहादुर शाक्य – हःखा
५ श्री ईश्वर मान प्रधान – सौगः
६) श्री सभापति लःपु जि.बि.स
७) श्री प्रमुख ललितपुर नगरपालिका
८) श्री महानिर्देशक पुरातत्व विभाग
५) श्री प्रमुख जिल्ला अधिकारी
१०) श्री हाकिम ल.पु. गुठी तहशिल कार्यालय
११) श्री अध्यक्ष लःपु उद्योग वाणिज्य संघ
न्हापांगु कार्य समितिया पदाधिकारिपिं व झिगु त्वाःया पाःलाः पिनिगुपाखें कार्य समिति प्रतिनिधिपिनिगु नां धलः क्वय् च्वयाथें जूगु जुल ।
१) अध्यक्ष श्री वत्स गोपाल वैद्य – सौगः
२) उपाध्यक्ष श्री बुद्धिराज बज्राचार्य – बुबहाः
३) सचिव श्री कृष्णदास ताम्राकार – हौगः
४) कोषाध्यक्ष श्री तारण बहादुर शाक्य – नागबाहाः
५) सहसचिव श्री शान्त मान शाक्य – ईबहि
प्रतिनिधि सदस्य
क्षेत्रनं १ श्री आशारत्न शाक्य – नः बहि
क्षेत्रनं २ श्री गोपाल बहादुर श्रेष्ठ – मंगः
क्षेत्रनं ३ श्री कृष्णमान मानन्धर – टंगल
क्षेत्रनं ४ श्री प्रेम बहादुर शाक्य – इखाछेँ नागबहाः
क्षेत्रनं ५ श्री सूर्यमान वज्राचार्य – हःवाहा, बुबहाः
क्षेत्रनं ६ श्री बालकृष्ण ताम्रकार – हौगः
क्षेत्रनं ७ श्री रत्नराज शाक्य – ओकुबहाः
क्षेत्रनं ८ श्री मोतिलाल शिल्पकार – ईखालखु
क्षेत्रनं ९ श्री दिव्य गोविन्द जोशी – कोबहाः
क्षेत्रनं १० श्री रामवीर श्रेष्ठ – सौगः
मू उद्देश्य
न्यकू जात्रा मतयाः व्यवस्था समिति नीस्वनागु इलय् क्वय् च्वयाथें मू उद्देश्यत न्ह्यथनागु जुल ।
१) धार्मिक समन्वयया आधारय् प्राचीन संस्कृतिया परम्परा कथं न्ह्याना वयाच्वंगु श्रृङ्गभेरि जात्रा मतयाः यात्रा पर्वयात राष्ट्रया अद्वितीय सांस्कृतिक सम्पदाया कथं संरक्षण व संवर्द्धन याना चीरकाल तक तुइका तय्गु ।
२) थुगु पर्वया दार्शनिक व सांस्कृतिक पक्षयात बांलाक अन्वेशन व अनुसन्धान याना थीथी कथं राष्ट्रिय व अन्तर्राष्ट्रिय स्तरय् ल्यंका तय्गु ।
३) थुगु पर्वयात कचिंग मवइगु कथं सुव्यवस्थित याना न्ह्यज्याकेत मदयकं मगागु म्यें हालेगु, वाद्यवादन व संगीतय विशेषत ल्याय्म्हपिनित अप्व आकर्षित यानाः वैज्ञानिक तरिकां प्रशिक्षण व तालिम विइगु व्यवस्था ई कथं यानाः वनेगु ।
४) परम्परागत गायन, वाद्यवादन व संगीतकलाय् विशेष ज्ञान दुपिं दक्ष कलाकार तथा थुकिया सम्वन्धय् प्रशिक्षण व तालिम बिइगु ज्याय् आपालं ईनिसें सेवायाना न्ह्यब्वय् ल्वय्क योगदान बियावःपिं प्रशिक्षक गुरुजनपिनित जिवित अवस्थाय् हे सम्मान यायेगु व आवश्यक जुल धाःसा वय्कपिनित फूचाःगु ग्वाहालि चू लाकाबिइगु ।
५) थुगु पर्व नापं स्वापु दुगु म्यें हालेगु वाद्यवादन संगीत आदिया सांस्कृतिक प्रदर्शनत प्रत्येक दँय् परम्परा कथं साविक बमोजिम आयोजना यायेगुया अतिरिक्त मेबलय् नं माःकथं ज्याइवः दय्का वनेगु ।
६) थुगु पर्व कय्च्यानाच्वंगु धार्मिक व सांस्कृतिक क्षेत्रय् जन चेतना ब्वल्हंका जन अभिरुचि अभिवृद्धि याना सुसांस्कृतिक समाज श्रृजना यायेगुलि योगदान बिइगु ।
७) थुगु पर्वया धार्मिक महिमा सांस्कृतिक गरिमा व राष्ट्रिय प्रतिस्थाय् छुं कथं नं आँच, बांमलाःगु लिच्वः मवइगु कथं थुकियात निरन्तर म्वाकातय्गु ।
८) थुगु पर्वया पाःलाः त्वाःयात माःगु तक फूगु कथं ग्वाहालि चूलाका बिइगु ।
९) झिगू टोलं पालंपाः याना संचालन जूइगु नवबाजाया म्यें, वाद्यवादन, संगीतयात परिष्कृत व परिमार्जित यानाः एकरुपता बिइगु कुतः यायेगु ।
१०) नवबाजाया परम्परागत गायन वाद्यवादन, संगीतयागु हे पृष्ठभूमि न्हूगु पद्धति व प्रविधित नं श्रृजना यायेगु तथा न्हू प्रतिभा तय्त थःगु शीप व कला विकसित यायेदइगु मौका बिइगु बिकेगु व ललितपुरय् परम्परागत गायन, वाद्यवादन, संगीत प्रतिष्ठान हे स्वनेगु कुतः याय्गु ।
११) न्यकू जात्रा मतयाः व्यवस्था समितिया पदावधि स्वदँ तक जुइ । वयाँलिपा न्हूगु कथं चुनाव याना संस्था न्हूधा याय्गु जुइ ।
१२) न्यकू जात्रा मतयाः व्यवस्था समिति छुं नं कथंया व्यवधान वल धाःसा दँ मुँज्या पिइम्वाक कार्यसमितिं हे निर्णय यायेगु व छुं कथंया व्यवधान वल धाःसा अनिवार्यकथं दँ मुँज्यां निर्णय याय्गु ।